Оюутны виз (D-2 / D-4)

Хоёулаа «суралцах» виз ч зорилго нь өөр. D-2 нь их дээд сургуульд ЗЭРЭГ горилж суралцахад (бакалавр, магистр, доктор) олгогдоно. D-4-1 нь сургуулийн дэргэдэх хэлний бэлтгэл төвд (어학당) солонгос хэл сурахад олгогдоно — зэрэг олгогддоггүй. Ихэнх монгол оюутан эхлээд D-4-гээр очиж хэл сураад, дараа нь сургуульд элсэж D-2 руу шилждэг. Аль замаар явахаа эхэнд шийдэх нь чухал: бүрдүүлэх баримт, санхүүгийн баталгаа, хугацааны хуваарь гурвуулаа өөр.

• D-2 — зэрэг горилно. Урьдчилсан нөхцөл нь сургуулиас олгосон элсэлтийн албан ёсны батламж (표준입학허가서)
• D-4-1 — хэлний бэлтгэл. Зэрэг олгогдохгүй, гэхдээ D-2 руу шилжих гүүр болно
• Хоёулаа урт хугацааны (91 хоногоос дээш) виз — сүрьеэгийн шинжилгээ ЗААВАЛ

D-2

Их дээд сургуульд суралцах

D-4-1

Хэлний бэлтгэлд суралцах

Виз мэдүүлэхийн өмнө сургуульд элссэн байх ёстой. Дараалал нь: сургууль сонгох → элсэлтийн материал өгөх → элсэлтийн батламж авах → (ихэнх сургууль) сургууль өөрөө цагаачлалын албанд визийн зөвшөөрлийн дугаар (사증발급인정서) мэдүүлнэ → та тэр дугаартайгаа виз мэдүүлнэ. Тиймээс «виз гарах уу» гэдэг асуулт нь үнэндээ «сургуульд орох уу, санхүүгээ нотлох уу» гэсэн хоёр асуулт.

Сургууль бүр өөрийн элсэлтийн журамтай (모집요강). Хугацаа, шаардлагыг тэр баримтаас шалгана — гуравдагч сайт эсвэл зуучлагчийн үгээр биш.

Та сургалтын төлбөр, амьжиргаагаа даах чадвартайг нотлох ёстой. Нотолгоо нь ихэвчлэн өөрийн эсвэл ивээн тэтгэгчийн нэр дээрх дансны үлдэгдлийн тодорхойлолт бөгөөд тэр мөнгө данс дээр ТОДОРХОЙ ХУГАЦААНД хөдлөлгүй байсан байхыг шаарддаг. Шаардагдах ДҮН, мөнгө хэдэн хоног дансанд байх ёстой нь сургууль болон консулын газраас хамаарч өөр — нэг ч албан ёсны нэгдсэн тоо байдаггүй. Тиймээс дүнг сургуулийнхаа олон улсын албанаас БИЧГЭЭР авч баталгаажуулна.

• Дүн, хугацааг сургуулийн олон улсын албанаас (국제처) бичгээр тодруулна
• Ивээн тэтгэгч (эцэг эх) байвал хамаарлаа нотлох баримт нэмэгдэнэ
• БНСУ-ын Засгийн газрын тэтгэлэг (GKS) авсан бол дансны хуулгын оронд сонгогдсон мэдэгдлээ өгнө

Виз мэдүүлэхийн өмнөхөн мөнгө оруулж, дараа нь татах нь хамгийн түгээмэл татгалзах шалтгаан. Мөнгө нь дансанд ТОГТВОРТОЙ байсан байх ёстой.

Оюутны виз нь урт хугацааны виз тул аялалын визээс илүү олон баримт шаардана. Бүрэн жагсаалт, тэмдэглэгээтэй хувилбарыг «Баримт бүрдүүлэлт» хуудсаас үзнэ үү — энд зөвхөн гол багцууд.

• Виз мэдүүлгийн маягт, 3.5×4.5 см өнгөт зураг (сүүлийн 6 сард авсан)
• Гадаад паспорт ба хуулбар — мэдүүлсэн өдрөөс 6 сараас дээш хүчинтэй
• Сургуулийн элсэлтийн батламж, эсвэл визийн зөвшөөрлийн дугаар
• Хамгийн сүүлд төгссөн боловсролын диплом, дүнгийн хуудас
• Санхүүгийн чадвар нотлох баримт
• Сүрьеэгийн оношилгооны хуудас — ЭСЯ-аас заасан эмнэлгээс

Баримтын хугацаа

Сүүлийн 3 сард гаргасан байх

Сүрьеэгийн шинжилгээ

Мэдүүлсэн өдрөөс 3 сарын дотор

Боловсролын баримт (диплом, дүнгийн хуудас) нь Монголд олгогдсон тул БНСУ-д хүлээн зөвшөөрөгдөхийн тулд баталгаажуулалт шаардана — апостиль эсвэл консулын баталгаажуулалт. Аль нь хэрэгтэйг сургууль өөрөө заана. Төрийн лавлагааг (төрсний бүртгэл, гэрлэлт) E-Mongolia-гаас авч болох ч ТҮЦ машинаас хэвлэсэн хувилбарыг ХҮЛЭЭН АВАХГҮЙ — нэг цэгийн үйлчилгээний төвөөс эх хувийг авна. E-Mongolia-гаас англи хэл дээр гарсан баримтыг дахин орчуулах шаардлагагүй.

Апостиль нь цаг авдаг (хэдэн долоо хоног). Элсэлтийн эцсийн хугацааны өмнөхөн эхлүүлбэл амжихгүй.

Аялалын визтэй ижил: ЭСЯ-д биечлэн хандаж болохгүй. Солонгосын виз мэдүүлгийн төв (KVAC) эсвэл албан ёсны төлөөлөн гүйцэтгэх байгууллагад хандана. Оюутны визийн хугацаа, хураамжийг мэдүүлэхээсээ өмнө KVAC-аас шалгаарай — ангиллаас хамаарч харилцан адилгүй.

KVAC утас

7766-8888

Вэб

visaforkorea.mn

ЭСЯ-ны визийн хэлтэс

7007-1030

Оюутны визийн хариу гарах хугацаа нь боловсролын баримтыг шалгах ажлаас хамаарч урт байдаг — сургуулийн хичээл эхлэх өдрөөсөө нилээд түрүүлж мэдүүлнэ. Татгалзсан хариу авбал тэр өдрөөс хойш 3 сарын дараа дахин мэдүүлэх эрхтэй болно; ижил материалаар дахин мэдүүлбэл дахин татгалзах магадлалтай.

Хуурамч, засварласан баримт 2 удаа илэрвэл БНСУ-д нэвтрэх эрх хязгаарлагдана. Диплом, дансны хуулга хоёр нь хамгийн нарийн шалгагддаг.

Виз бол нэвтрэх зөвшөөрөл — оршин суух эрх биш. 90 хоногоос дээш байх бүх гадаад иргэн нэвтэрсэн өдрөөс хойш 90 хоногийн дотор харьяалагдах цагаачлалын албанд гадаад иргэний бүртгэл (외국인등록) хийлгэнэ. Ихэнх сургууль оюутнаа цуглуулж хамтад нь бүртгүүлдэг тул олон улсын албаныхаа зааврыг дага. Дэлгэрэнгүйг «Солонгост амьдрах» модулиас.

Бүртгэлийн хугацаа

Нэвтэрснээс хойш 90 хоногийн дотор